කොකෝ ෆාමින්

දැනට මාස හතර පහකට කලින් මමයි මගේ ප්‍රියාදර බිරින්දෑයි සිඩ්නි ඉඳන් බ්‍රිස්බේන් ගියා පොඩි වැඩ වගේකට. පැය නවයක් විතර ඩ්‍රයිව් කරන්න තියෙන කම්මැලි කමට අහස් යාත්‍රාවෙන් තමා ගමන ගියේ..

ඔන්න වැඩකටයුතු ඉවර කරලා ආපහු එන්න බ්‍රිස්බේන් වලින් පිටත් උනාම අපිට එහා පැත්තේ සීට් එකේ ඉන්නවා අඩි හය හමාරක විතර අවුරුදු විසි ගානක වගේ කොල්ලෙක් පොතක් කියෝ කියෝ. පොර පොඩි හිනාවක් එහෙම දාලා පොඩ්ඩක් කතාවට සෙට් උනා.

අතේ තිබ්බ පොත ඉන්ග්‍රිසි නොවෙන හින්දා තේරුම් ගියා මේකා මෙහෙ එකෙක් නොවෙන බව. ඊට පස්සේ කතා කරපුවහම කියපි ඕලන්දක්කාරයෙක් කියලා..

තොපේ කිරිකිත්තලා අපේ රටට ඇවිත් කරපු විගඩම් අසානාසි ගැනත් පොඩ්ඩක් මනුස්සයා දැනුවත් කරගෙන යද්දී මේ අහිංසකයා කිව්වා උන්නැහේ මේ රොක්හැම්ප්ටන් ඉඳන් නෙදර්ලන්තේ ගෙදර යන ගමන් කියලා.. පැය 24 කට වඩා ගමනක්!

"මං මාස හයක් රොක්හැම්ප්ටන් වල වැඩ කළානේ.. මගේ agriculture degree එකේ internship එක. එහෙ තියෙන *Coco farm එකක තමා හිටියේ"

ඔය කියන ඉසව්ව ඕස්ට්‍රේලියාවේ ඊසාන දිග තියෙන ලංකාවට සමාන දේශගුණයක් තියෙන පැත්තක්. අහිංසකයා ඕලන්දේ ඉඳන් පොල් වවන්න එන්න ඇති.

මමයි මගේ බිරින්දෑයි පොල් ත්‍රිකෝණේ ජනතාව වෙච්චි, මේ වගේ අවස්තාවක් මඟ ඇර ගන්නේ කොහොමෙයි. බැස්සා ගේමට!

"අපේ ලංකාවෙත් *coco වගාව සැරටම තියෙනවා. ප්‍රධාන ආදායම් මාර්ගයක්. ගොඩක් මිනිස්සු ගෘහ කර්මාන්තයක් විදිහටත් කරනවා."

දැන් අර කොල්ලා හරිම අවධානයෙන් අහගෙන ඉන්නවා!

"Seriously! මම දැනගෙන හිටියේ නෑනේ!"

"ඔව් ඔව්! අපි හැම කොටසක්ම ප්‍රයෝජනයට ගන්නවා. වැඩියෙන්ම food purposes තමා.. එතකොට ඔය ලණු හදන්න එහෙමත් ගන්නවා."

"ඈ!" - දැන් කොල්ලා කටත් ඇරගෙන අහගෙන ඉන්නවා...

ඔහොම ටික වෙලාවක් ලංකාවේ පොල් වගාව ගැන දේසනයක් උඩු ගුවනේ කළාට පස්සේ ඒ කොල්ලා කිව්වා.. ඉන්නකෝ මම හිටිය ෆාම් එකේ පොටෝ ටිකක් පෙන්නන්න කියලා..

අපි නොදන්න පොල්! පෙන්නපංකෝ බලන්න කියලා බලද්දි මිත්‍රවරුනි කියන්න සංතෝසයි අපි හොඳම එකෙන් විඳලා!

මෙන්න මේකා පෙන්නන්න පටන් ගත්තා.. ටැංකි වල දමාපු කිඹුල්ලු! ඊට පස්සේ කිඹුල්ලු අල්ලන වීඩියෝ... කිඹුල් හමවල්!

කාලා වරෙංකෝ! උඩු ගුවනේ ප්‍රෙශර් ඩිෆරන්ස් අනං මනං ඔක්කොම එක්ක Croco කියන එකේ "ආර්ර්" අකුර අපි දෙන්නටම ඇහිලා නෑ...

රොක්හැම්ප්ටන් වල වගේ ගොඩක් ඕස්ට්‍රේලියාවේ ප්‍රදේශ වල හම් සඳහා කිඹුල්ලු ඇති කරනවා. කිඹුල් මස් කියන්නේ ඒකේ අතුරු නිශ්පාදනයක්. මේකා ඉඳලා තියෙන්නේ එහෙම තැනක.

කොහොමෙන් කොහොම හරි කොල්ලා අපි දෙන්නත් එක්ක හොඳට කතාබහ කරලා හිනා වෙලා සිඩ්නි වලින් බැහැලා අනිත් ෆ්ලයිට් එක ගන්න ගියා.

නිකමට හිතපංකෝ... අපි හැමදාම croco (crocodile) කෑමට ගන්නවා එහෙම කිව්වහම අභිමානවත් සිංහල ජාතියේ නිර්භීතකම ගැන අර ඕලන්දක්කාර කොල්ලට කොහොම හිතෙන්න ඇතිද!

මැටි කිඹුල් දඩයම

මගේ ප්‍රියම්බිකාව කියන විදිහට මැටි කිඹුල් දඩයම කියන්නේ පිරිමි වෙච්චි අපේ ප්‍රියතම ක්‍රීඩාවක්.

ඒක පටන් ගන්නේ මෙහෙම..

මුලින්ම හොඳ බරසාර මැටි කිඹුලෙක් හොයාගන්න ඕනි. ඇමසන්, ඊ බේ , සුපර් මාකට්, ලෙගෝ ශොප්, සෙල්ලම් බඩු කඩ, ඉලෙක්ට්‍රොනික් බඩු සාප්පු, කැමරා කඩ, හාඩ්වෙයාර් කඩ වගේම ෆේස්බුක් මාකට් ප්ලේස් එකේ උනත් ඔය මැටි කිඹුලෝ ඉන්න පුළුවන්.

මගේ අත්දැකීමෙන් මට නං හොඳටම මැටි කිඹුලෝ සෙට් වෙලා තියෙන්නේ සෙල්ලං බඩු කඩ, ලෙගෝ ශොප් වල සහ බනින්ග්ස් වගේ හාඩ්වෙයාර් ශොප් වල රාක්ක අස්සේ හැංගිලා ඉඳලා. ඔය ඩැයල් හැංගිලා ඉන්න හරිම දක්ෂයි… හොඳ පළපුරුදු ඇහැකට විතරයි මේ නං සුපිරි මැටි කිඹුලෙක් කියලා අඳුන ගන්න පුළුවන්.

ඊට පස්සේ හොඳට සෝදිසි කරලා බලන්න ඕනි අපි ටැකල් කරගත්තු මැටි කිඹුලට ඩිස්කවුන්ට් එහෙම වැටිලා තියෙනවද කියලා.. බ්ලැක් ෆ්‍රයිඩේ වගේ සීන් එකක් නං මරු. එතකොට බජට් ඇපෲවල් එක ඊසි. ඒත් එක්කම බෝනස් එකක් එහෙම account එකට වැටිලා තියෙනවානම් ඔයා වාසනාවන්තයෙක්!

ඔය ප්‍රයිස් රිසර්ච් එක යද්දිම හොඳට review එහෙම බලන්න ඕනි. මොකෝ මැටි කිඹුල්ලු හැම එකාම වටින්නේ නෑ.. YouTube පැය විස්සක් විසි පහක්, බ්ලොග් පෝස්ට් දුසිමක්, Reddit thread දහයක් විතර ගොඩ දැම්මහම අපිට තේරෙනවා මේ මැටි කිඹුලා නං සුපිරි…මූ හරිම අත්‍යවශ්‍ය එකෙක් කියලා.. ඔය literature review එක attachment එකක් විදිහට ඉහළ මන්ත්‍රී මන්ඩලයට දාන්නත් යොදා ගන්න පුළුවන්.

ඒ අතරවාරේ පුළුවන් සෙසු මැටි කිඹුල් දඩයම් බලකාය (මැ.කි.ද.බ) දැනුවත් කරන්න. ලෝකේ වටේ විහිදිලා ඉන්න ඒ උදාරතර මිත්‍ර රත්නයට පුළුවන් ඒ ඒ රටවල් වල මැටි කිඹුලන්ගේ ප්‍රයිස්, උන්ගේ සයිස් වගේ දේවල් ගැන හොයන්න උදව් වෙන්න. ඒත් එක්කම අපි දඩයම් කරන්න බලාපොරොත්තු වෙන ජාතියේ එකෙක් බලකායේ එකෙක් ගොඩ දාලා තියෙනවනම් වැඩේ ලේසියි. මොකෝ පොර අර literature review එක කරලා තියෙන්නේ. එව්වා open source විදිහට share කරගන්න මැටි කිඹුල් දඩයම් බලකාය ඕනි වෙලාවක සූදානම් වෙලා ඉන්නේ.

ඊට පස්සේ පුළුවන් හොඳ වෙලාවක් එහෙම බලලා.. තමන්ගේ ආදරණීයයන් dinner එකකට එහෙම අරං ගියාට පස්සේ වගේ දවසක උදේම නාලා කාලා පිරිසිදු වෙලා අපි ටැකල් කර ගත්තු මැටි කිඹුලා අල්ලගෙන එන්න යන්න. ඕක BBQ මැශින් එකක් වගේ වාහනේට ෆිට් වෙනවටත් වඩා ලොකු එකක් නං මැ.කි.ද.බ ට inform කරපුවහම ලොකු කැබ් එකක්, trailer එකක් උනත් හොයා ගන්න පුළුවන්.

සාඩම්බර විදිහට මැටි කිඹුලා ගෙදර ගෙනාවට පස්සේ හොඳට නාවලා කරලා අරගෙන ෆොටෝ එකක් එහෙම අරගෙන බුකියට දාන්න. එතකොට අනිත් මැ.කි.ද.බ සාමාජිකයන් උනත් දැනුවත් වෙනවා මෙහෙම එකෙක් ඉන්නවා දඩයම් කරගත්තානම් හරි කියලා.

ඔන්න ඔහොමයි මිත්‍රවරුනි මැටි කිඹුලෙක් ව සාර්ථක විදිහට දඩයම් කරගන්නේ. දඩයම් කරගත්තට පස්සේ එන බර බර, මේක තියෙන්න ගෙදර ඉඩක් වත් නෑ, දූවිලි පිරෙනවා වගේ එන දූෂමාන චෝදනා වලට කන් පාත් කරගෙන ඉන්න ඕනි. මොකෝ කාලයක් ගිහාම ඔව්වා පට්ට වටිනවා!